Kon transparente Kòrsou ta?
Category 0000-00-00
Korsou Solidario i Duradero: Kon Transparente Kòrsou ta?
Ya ta tres aña ku Transparency International, ku ta yuda kombatí korupshon rònt mundu, a publiká su rapòrt riba nos Sistema Nashonal di Integridat aki na Kòrsou. E rapòrt ta a base di estudio di e institushonnan mas importante di Kòrsou pa kombatí korupshon, promové transparensia, halsa responsabilisashon i bon gobernashon. Ta un estudio pa yuda kontestá e pregunta“Kon transparente Kòrsou ta?”. A resultá ku sektor públiko, partidonan polítiko i medionan di komunikashon ta e partinan mas débil di Kòrsou su abilidat pa kombatí korupshon. E rapòrt a konkluí ku tin un deskonfiansa grandi di pueblo di Kòrsou, den Kòrsou su institutonan klave i den e hendenan ku ta manehá nan. E falta di konfiansa ei ta stroba bon gobernashon.
Bon gobernashon ta un di e puntonan di lansa di Korsou Solidario i Duradero. Bon gobernashon no ta un eksigensia djis pa smak, pero e ta mará na kondishon importante pa relashonnan sano den hinter nos komunidat, i ta estrechamente ligá ku durabilidat, i ta krea un komunidat den kua nos tur ta sinti nos mes na kas, kaminda suidadanonan ta solidario ku otro i no ta buska solamente nan propio interes a kosto di otronan, ekskluyendo gruponan, of a kosto di futuro generashonnan.
Pa yuda nos kontestá e pregunta “Kon Transparente Korsou ta?” Transparency Internashonal a uza e mesun instrumento ku el a uza den masha hopi pais, i ku kua Transparency International tin hopi eksperensia. Tambe nan a hasi uzo di un tim di investigashon i eksperto lokal, pa tene kuenta ku e aspektonan ku ta típiko pa nos komunidat. Nan a traha ku masha hopi instansia i persona lokal, pa e interkambio di informashon i diálogo por tuma lugá na un nivel haltu di partisipashon.
A base di e manera ku Transparency International a traha, nos mester konklui ku e rekomendashonnan final ta un set amplio di konseho ku nos komunidat mester ke hasi algu ku nan, pa trese kambio positivo den nos komunidat, i drecha loke nos mester drecha. Ta bin aserka ku ta nos Gobièrnu mes a duna enkargo na Transparency International pa hasi e investigashon. Ku otro palabra, palabra awor ta na suidadanonan pa vigilá Gobièrnu, i gobernantenan ku nan eligí, pa kontrolá si nan ta komportá sigun reglanan di transparensia, bon gobernashon, integridat i tambe pa wak si nan ta implementá e rekomendashonnan den e rapòrt riba nos Sistema Nashonal di Integridat. Ta dilanti nos ke bai!
Sigun e raport di Transparency International partikularmente partidonan polítiko na Kòrsou no ta funshoná bon den tur aspekto. “Tin un potensial riesgo ku disiplina di partido ta dominá gobernashon tantu serka miembronan di Parlamentu komo den Konseho di Minister (gobièrnu). Esaki por stroba un posishon independiente di ámbos institushon i loke ta preokupante ta ku e ta nubla e separashon di poder manera e ta ankrá den Konstitushon.”, asina Transparency International a komentá. E relato di e Sistema Nashonal di Integridat ta revelá ademas, ku e poder legislativo no ta hasi uso na drechi di tur e hèrmèntnan di supervishon na su disposishon pa tene Gobièrnu responsabel!
Ademas, den e kapítulo dediká na partidonan polítiko Transparency International ta bisa ku partidonan polítiko no ta obligá pa lei pa publiká informashon tokante nan finansiamentu di kampaña, ku mayoria no ta informá tampoko ta di unda nan a haña finansiamentu, ku tin buraku den e lei tokante finansiamentu di partido ku ta hasi kontrol hopi difisil. Pa loke ta trata strukturanan i funshonamentu demokrátiko den seno di partidonan mes, Transparency International a risibí kontesta di solamente 1 partido tokante funshonamentu inetrno demokratiko, pues no tin un bista general di e funshonamentu interno di partidonan, ni kon demokratiko e partidonan ta ku nan miembronan. Diferente partido e yega di hiba kampaña tokante responsabilisashon públiko i transparensia, pero kasi ningun no a kumplí ku nan palabra.
Transparency International a mustra tambe riba e nesesidat pa krea kondishonnan pa garantisa integridat di empleadonan di medionan di komunikashon, pa periodistanan por hasi mas trabou investigativo. Esei, mirando ku hopi medio di komunikashon ta dependé pa un gran parti di finansiadónan privá ku ta paga pa aviso i propaganda den e medioanan. E trabou investigativo di periodistanan por a yuda trese mas klaridat riba por ehempel e fuentenan di finansiamentu di partidonan polítiko, di funshonamentu di Parlamento i di Gobièrnu. Importansia di medionan di komunikashon ku ta funshoná imparsial den nos komunidat tambe tabata tópiko di un otro investigashon resien ku un otro organisashon internashonal, esta UNESCO, a hasi na Korsou.
Tur sektor di sosiedat mester bringa pa halsa e nivel di transparensia den nan propio aktividatnan, prosedimentunan interno, partidonan politiko en espesial. ‘’Korupshon no ta un fenómeno isolá i pa kombati’é tur institushon, i tur sektor mester koperá ku otro pa lanta para i pone un fin na e situashon ku hende por kometé korupshon sin haña kastigu. Prevenshon efektivo di korupshon no ta responsabilidat solamente di e lidernan, pero di tur habitante di Kòrsou”, segun Alejandro Salas, Direktor Regional di Transparency International pa e kontinente Merikano, a bisa. “Hende mester konosé nan derechonan i mira pa nan polítikonan eligí responsabilisá nan mes”.