Gobernashon ekselente
Gobernashon Ekselente
Gobièrnu ta nos, e pueblo.
Nos ta gobièrnu i gobièrnu tei pa nos. Nos, siudadanonan, hende di karni i wesu ta e poblashon di Kòrsou. Gobièrnu ta konsistí di hendenan di karni i wesu ku ta tuma desishonnan. Gobièrnu ta konsistí tambe di diferente instansha i organisashon. Den tur forma, for di e parlamentarionan elegí, ministernan, pero tambe ámtenarnan na e ministerionan, polis, i trahadónan na bali den edifisionan di gobièrnu, e país Kòrsou ta goberná dor di hende di karni i wesu. Polítikonan i funshonarionan di gobièrnu tambe ta siudadano, tin famia i ta biba na diferente lugá riba nos isla.
Gobièrnu ta di siudadano, pa siudadano.
KSD ta para pa un gobièrnu ku ta na disposishon di e pueblo di Kòrsou i tur ku tin Kòrsou den su kurason. Pa e motibu ei KSD tin e 10 puntonan di enfoke ku lo kontribuí na un bon gobernashon ku kua por logra balornan prinsipal di libertat, seguridat, progreso ekonómiko i desaroyo kultural mas mihó.
Integridat
Tur ku ta ehersé un funshon públiko mester ta di komportashon intachabel. Sea ku ta trata un persona ku ta tuma desishon tokante di plaka di gobièrnu, o un persona ku ta vigilá seguridat riba kaya, forma parti di gobièrnu ta nifiká ser 100% integro. Den filosofía di KSD no ta eksistí un tiki integridat of interes propio. Esaki ta nifiká ku mester skrin tur hende ku direktamente o indirektamente ta pará riba payroll di e pagadó di belásten. Esun mas profundo ku e otro, dependiendo di su funshon. KSD sinembargo no ta hasi distinshon den ki ora un persona den servisio di gobièrnu traspasá límite di aktitut íntegro. No tin lugá pa esun ku violá integridat, ni pa Gobernador ni pa esun pará tras di bali o esun ku ta traha den limpiesa.
Seguridat na promé lugá
Gobièrnu t’ei primariamente pa protehá siudadanonan. KSD ta para pa seguridat tur kaminda den espasio públiko i na e lugá mas prinsipal di e individuo, den su mes kas. Mester protehá tur hende kontra personanan ku mal intenshon i den sierto kaso kontra nan mes. KSD ta boga pa un aparato di mantenshon hudisial supstansial, efisiente i integro. Seguridat ta kuminsá ku prevenshon den tur area di nos komunidat. Den sierto situashon i bou di kondishon estrikto, represhon ta inevitabel. Hinter e kadena di mantenshon di derecho mester ta dirigí riba kombatimentu i prevenshon efektivo i permanente di kriminalidat.
Aktua di un forma legítimo i kouteloso
Den un estado di derecho tur hende ta mantené su mes na regla. Esaki ta konta tambe pa tur ku ta den servisio di gobièrnu. No tin lugá pa kani-mi-pa-mi-kani-bo, nepotismo, froude i korupshon. Kada akto ku sali for di servisio públiko, esta gobiérnu, i tur ku ta kai bou di dj’e, for di protekshon di derecho humano te ku mantené bo mes na normanan di desensia, mester ta basá riba lei.
Transparensha i responsabilidat
Transakshonnan di gobièrnu ta transparente i públiko. Tur ku ta den servisio di gobièrnu ta traha di un forma transparente i ta duna kuenta i rason di e trabou ku e’la ehekutá.
Tur hende ta partisipá
Gobièrnu ta traha di un forma efisisiente i servisial pa ku su siudadanonan. Den toma di desishon ta tuma den konsiderashon interes di tur esnan envolví. Gobièrnu ta fasilitá i ta stimulá di un forma aktivo partisipashon di siudadanonan.
Biba ku privasidat i den libertat
Gobièrnu no sa tur kos, pero hopi di nos. Tur ku den su funshon tin di haber ku informashon personal delikado mester trata esaki ku máksimo koutela. Den legislashon i den maneho mester resaltá ku gobièrnu ta proteha privasidat di siudadanonan.
People-Planet-Profit, tambe den gobernashon
Gobièrnu ta stimulá desaroyo di hende, protekshon di naturalesa i ta realisá desaroyo ekonómiko. Legislashon i maneho mester ta dirigí riba tumamentu di e pasonan pa un desaroyo duradero dor di un meskla di hende, planete i kresementu ekonómiko. E toma di desishon di gobièrnu tin komo meta duna hende e oportunidat pa desaroyá su mes, proteha e ambiente kaminda e te biba i stimulá prosperidat.
Menos regla i sero burokrasia
Servisionan di gobièrnu mester ta alkansabel. Kada kontakto ku un funshonario di gobièrnu mester ta na alkanse di un i tur. Esaki ta trese ku n’e menos regla i transparensha den e kondishonnan pa optené un pèrmit óf desishon faborabel. Sea ta trata un afsprak pa renobá pasaporte o entraga di un pèrmit di konstrukshon: proseso mester ta lihé, e termino kòrtiku i e servisio mester ta di un forma servisial.
Kolaborashon internashonal
Kòrsou ta únikamente geográfikamente un isla. Gobièrnu mester stimulá i fasilitá kolaborashon internashonal. Esaki mester sosodé tantu riba nivel di mando ku nos partnernan den Reino, komo ku nos partnernan ekonómiko den region. No ta na nodi inventá wil di nobo. Nos mester pensa “out of the box”. Mester tin kolaborashon entre universidatnan, empresarionan i asta huristanan legislativo, Kòrsou ta bai internashonal.
Plaka di gobièrnu ta nos plaka
Presupuesto di gobièrnu ta konserní nos tur. Finansa di gobièrnu ta p’esei tambe tópiko konstante di preokopashon. Gobièrnu ta sòru pa mantenshon na su propio regla di presupuesto esta ku no ta saka mas ku ta drenta. Tur esnan ku ta den funshon públiko mester ta konsiente di konsekuensia di su aktonan. Un desishon robes riba kaha di gobièrnu ta afektá nos tur. Tarea di gobièrnu ta di hasi transparente kiko e konsekuensianan finansiero ta di kada desishon ku el’a tuma. Niun hende no gusta paga belásten i tur hende ke e mihó fasilitashon i kuido. Esaki ta kosta plaka, plaka di nos tur. Pa e motibu ei ta pone mas tantu posibel tareanan di gobièrnu den destaha públiko. Kontrakt ku gobièrnu mester ta a base di relashon hustu entre preis i kalidat, i no a base di posishon monopolístiko. KSD no ta mira espasio pa kontraktnan semehante i ta lucha pa disolvé nan mas tantu posibel of pa adaptá nan na kondishonnan mas faborabel.