Solidaridat i Union
Solidaridat, Pas i Union
Nos ta biba huntu riba e isla aki i riba e mundu aki. Loke nos hasi òf keda sin hasi por tin efekto riba otro hende, nos medioambiente, animalnan i naturalesa rondó di nos. Komo parti di nos komunidat nos ta rekonosé nos interesnan komun na diferente manera. Tin bia e interes komun ta eksigí sakrifisio di nos komo individuo, pero e union den nos komunidat debidamente tin su bentahanan. Nos komunidat a tuma diferente medida pa fortifiká e union i solidaridat.
Puntonan di sosten pa solidaridat
Nos ta menshoná diferente medida, djis pa ilustrá. Den nos sistema hudisial hues imparsial ta funshoná komo esun ku ta tuma desishon riba tur partido, e ta fortifiká e balornan sentral manera imparsialidat, independensia, integridat i profeshonalidat i asina ta kontribuí na mantenshon di nos komunidat. Referendum ta un instrumento legal ku por uza pa sa den kua direkshon e komunidat ke bai, ora ta trata di desishonnan importante ku e Gobièrnu ke/ a tuma. Den un seguro kontra gastu di malesa en general bo prima no ta na rason di bo historia médiko individual i òf bo gastunan real pa kuido di salu. Ora bo ta malu, otro hende ta kuida bo. Ora bo bira grandi, bo mester por gosa di un penshun rasonabel. Servisionan di kuido di salú i kuido sosial ta sostené hendenan ku un òf otro limitashon físiko o mental, pa nan por partisipá den kos komunidat i duna nan kontribushon. Un outoridat pa konsumidó por supervisá i pèrkurá pa empresanan kumpli ku derechi di konsumidó. Un outoridat di kuido por vigilá pa desishonnan balansá keda tuma den e ambiente kompliká di kuido, i seguro di kuido; di otro manera e pashènt ku ta esun mas debil den e sistema por pèrdè. Servisionan di Inspekshon di Gobièrnu, manera esun enkargá ku Labor òf ku Kuido di Salú, tin tarea pa pèrkurá ku ta kumpli ku reglanan ku ta protehá e siudadano. Partidonan polítiko ku funshoná internamente di un manera mas demokrátiko ta duna espasio pa mas i mihó partisipashon di e siudadano. Kolegio pa Supervishon Médiko i proseduranan di keho ta aportá pa koregí fayonan.
Solidaridat: semper por mihó!
Ta importante pa kada siudadano por realmente sinti ku e ta parti di un kolektividat, i ku nos komunidat ta krea un ambiente den kua nos tur, sin ekskluí ningun di nos, por biba nos bida i realisá kada un di nos su potensial. Un komunidat bon i sivilisá ta brasa tur su miembronan na mesun manera i ku mesun kalor. Nos ta hasi un yamada na tur siudadano pa kuida nos komunidat i e instrumentonan ku ta sosten’é, i pa yuda pensa kiko por hasi nos komunidat mihó.
Más demokrasia
Un sosiedat demokrátiko ta un sosiedat kaminda siudadanonan ta partisipá i kontribuí na gobernashon di nos país. Awendía no ta 1 biaha kada 4 aña so gobièrnunan ta konsultá nan siudadanonan. Mas i mas nos ta mira ku un ciudadano por partisipá di un forma konstruktivo via referenda konsultativo of desisivo.
Tantu departamentunan gubernamental komo N.V. di gobièrnu por introdusí un sistema kaminda siudadanonan por entregá un keha òf un idea ku nan tin pa mehorá e servisio kos nos komo kliente ta haña.
Igualdat
Kòrsou Solidario i Duradero ta kere ku e forma kon e hendenan mas fragil den nos komunidat ta wòrdu tratá ta bisa hopi di ken nos ta komo país. Siudadanonan fragil manera nos hobennan ku problema di droga i alkòhòl, nos mamanan tiner, nos personanan ku hèndikèp mester wòrdu tratá di un forma ku nan tambe por hasi uso di nan derechinan i kumpli ku nan obligashonnan. Pa esaki mester sòru pa tin e infrastrukura adekuá. Nos tur tin e mes un oportunidat pa por desaroyá nos mes. Pa esaki nos komunidat mester por brinda e siudadanonan aki tur instrumento nesesario pa nan por biba un bida digno.
Salubridat
Tanten tin salú, tur kos ta posibel” ta un dicho ku ta ekspresá un sabiduria impreshonante di nos grandinan. E dicho ta parti di nos herensia kultural! Salú ta e fundeshi pa bo felisidat, i bo tin derechi riba tur dos! KSD ta traha duru pa bo por konstruí ku konfiansa riba e fundeshi ei. Nos ke pa tur hende ta salú. Nos ke pa rumannan ku ta sufri di kebrante di salú bira bon mas lihé posibel. Siudadanonan ku tin un òf otro limitashon mester por konta ku sosten di nos komunidat, di tal manera ku nan por ta optimalmente aktivo den nos komunidat.
1. P’esei bo mester por yega fásil na kuido di salú públiko, dòkter di kas, kuido primario, kuido di hòspital, kuido di durashon largu, kuido i sosten sosial. Bo mester por paga pa e kuido, e kuido mester ta di bon kalidat. E mester ta na midí di e nesesidat i eskoho di hinter komunidat i gruponan manera hóbennan, hendenan grandi òf hende ku un òf otro limitashon. Mester fiha eksigensianan mínimo ku ta konta pa hinter Reino.
2. Hopi sèn, energia i tempu a bai den lantamentu di strukturanan, manera introdukshon di seguro básiko, trahamentu di hospital nobo. Abo komo siudadano òf kliente , pagadó di prima di seguro básiko, no tin bon bista riba lokual ta pasa, i e motibunan. Bo no ta haña kuenta i rason, ku konsekuensia ku bo ta para un banda sin por influensia kosnan ku sin duda ta afektá bo bida. Ta tarea di Gobièrnu pa promové ku ta skucha loke bo tin di bisa, i si ta nesesario Gobièrnu mester obligá e instansianan pa skucha bo. Kisas esei ta posibel den koperashon ku Fundashon pa Konsumidó
3. Inspekshon di Salú i e Órgano Disiplinario Médiko (“Medisch Tuchtcollege” ) mester ta muchu mas aksesibel pa e siudadano. Kòntròl riba kalidat di kuido médiko mester ta imparsial, ku interes di e siudadano, kliente òf pashènt den mente. E kòntròl mester kubri manera di funshoná di profeshonalnan i institutonan den kuido, e manera ku institutonan ta atendé ku kehonan, ehekushon di tareanan di salú públiko, maske ku esei ta keda ehersé dor di gobièrnu. E siudadano mester por rekonosé e kòntròl ku ta keda hasi.
4. E Outoridat di Kuido (“Zorgautoriteit”) ta parti esensial di e sistema di repartí tarea na un manera balansá entre e órgano ku ta ehekutá e seguro básiko (SVB), i Gobièrnu. Tanten no instituí e Outoridat di Kuido, parti di tareanan den interes di e siudadano ta keda neglishá. Mester instituí e órgano ei mas lihé posibel.
5. Mester evaluá e funshonamentu di SVB riba e área di ehekushon di e seguro básiko, pa wak si SVB ta kumpli ku su tarea na un manera efisiente.
6. Paisnan den Reino Hulandes mester regla ku otro pa kuido di spesialista bira posibel den Reino mes, pa evitá ku siudadanonan tin ku bai den eksterior pa kuido spesialisá.
7. Prevenshon di malesanan króniko manera malu di suku i malesanan di nir mester duna fruta. Mester fortifiká prevenshon di malunan infeksioso manera chikungunya i zika drástikamente, ku e fin di kuida salú di nos siudadanonan i nan felisidat i evitá daño na entre otro produktividat i desaroyo ekonómiko. Gobièrnu tin ku aktua fuerte kontra organisashonnan òf hendenan ku ta komportá na un manera ku ta oumentá e rísiko di infekshon