Durabilidat
Un Kòrsou duradero
Ku ‘Kòrsou Duradero’ nos kier men un Kòrsou ku e abilidat i kapasidat pa pèrkurá pa su mes i mantené su mes, awor i den futuro. Nos mester por kumpli ku nos nesesidat di awe, sin limitá e posibilidat i potensial di futuro generashonnan. Nos yu i nietunan mester heredá e oportunidat pa biba un bida bon i salú. Nos no mester biba awe, produsí i susha sin tene kuenta ku nan. Nos futuro siudadanonan tambe mester por forma nan bibá na Kòrsou. Nos ekonomia mester tin na promé lugá rèspèt pa salú di nos hendenan i no mag kousa daño na nos medio ambiente.
Awendia ta konsiderá un pais ku medioambiente sano un pais duradero. Banda di e echo ku naturalesa a demonstrá di ta un bon remedi kontra stress, e por ta un fuente interesante pa generá entrada ku turismo, industria i siensia ekológiko (por ehèmpel un universidat i sentro di research marítimo).
Si nos kier biba di un forma duradero i laga kondishonnan atras di tal manera ku nos yunan i nietunan tambe por biba di un manera sano, nos mester tuma nos rikesanan natural na serio i bini ku maneho pa eduká nos hendenan i protehá nos naturalesa.
Pa realisá un Kòrsou ku ta duradero, Kòrsou Solidario i Duradero (KSD) kier introdusí 3 punto komo base pa durabilidat.
Maneho di Sushi - Resiklahe
Krea un sistema duradero pa atendé ku sushi. Nos ‘landfill, ku promé tabata un buraku pa tira sushi aden, a para bira un seru pa tapa sushi (un ‘waste- hill’). E seru di sushi ei na Malpais ta kresiendo dia pa dia. Pa no papia di e saku di plèstik i papel i bòternan ku bo ta haña bentá tur kaminda, rònt Kòrsou. Mondinan ta un desaster. Pa stòp esaki di sosedé nos mester kuminsá na reeduká nos mes kon bolbe uza produktonan, e asina yamá : ‘recycle’, resiklahe. Por hiba bòter di glas na sentronan di resiklahe pa laba i re-uzá òf pa kibrá i uza e glas pa traha otro bòter òf otro artefakto di glas. Asina nos por limitá e kantidat di bòter den sirkulashon i limitá sushi riba kaya. Banda di esei por stimulá uzo di tas di man na lugá di saku di plèstik, pa despues eliminá uzo di saku di plèstik kompletamente. Tambe mester resiklá papel ( korant, saku di papel i karton di ekipahe, etc. ).
Nos no mester pèrdè di bista ku Kòrsou ta un isla di solamente 444 kilometer kuadrá i si nos no kuminsá pensa awe riba maneho di sushi, desaroyo ekonómiko lo nifiká mas sushi, mas seru di sushi na Malpais, mas sushi banda di kaminda i mas sushi den nos mondinan. Kon atendé ku sushi mester bira prioridat, sino nos yunan i nietunan lo haña nan ta biba mañan literalmente den sushi. Kon atendé ku sushi mester bira parti integral di maneho di gobièrnu
Energia alternativo
Ban hasi mas uzo di energia alternativo. Na e momentunan aki nos ta generá mas tantu di nos energia via di petroli. Pa realisá esaki nos ta kima e petroli pa krea elektrisidat òf destilá awa di laman den awa pa bebe. Kima petroli ta emití gasnan manera Co2 ku ta subi temperatura di mundu. Esaki ta kousa ku sierto parti di mundu tin hopi sekura miéntras otro parti di mundu áwaseru ta kai sin stòp. Pa entre otro e motibu aki na final di aña 2015, 77 pais a sera un akuerdo pa stòp temperatura di mundu sigui subi. Esaki ta nifiká ku rònt mundu ta baha uzo di líkido i gas fosil (manera petroli) poko poko te dia stòp definitivamente ku produkshon. Nos yunan i nietunan ta bai haña nan obligá na dil ku e asuntu aki i p’esei nos mester kuminsá pensa for di awor riba otro forma pa produsí energia.
Kòrsou ta bendishoná ku e fuente natural mas grandi di energia na mundu, ku ta solo! Ku pènel di solo nos por generá energia na abundansia den dia, i awendia tin baterianan spesial pa por warda e energia ei pa nos por uz’e anochi. Banda di esei nos ta disponé di bientu i hopi laman rondó di nos, ku tambe por ta fuente di energia. Banko di desaroyo Europeo a buta hopi miar di Euro disponibel pa finansiá proyektonan pa hasi transishon di energia fosil pa energia for di fuentenan natural manera solo, bientu òf koriente di laman. ‘Kòrsou Solidario i Duradero’ ta di opinion komo nos pais ta forma parti di Reino, nos tin un Akuerdo di Asosashon ku Komunidat Oropeo, a base di e Akuerdo aki nos tin derechi riba e fondonan ei pa kambia nos sistema di generá energia i i di maneho di sushi. (Wak a parti ku ta trata fondonan Oropeo)
Durabilidat den edukashon
Introdusí un sistema edukashonal pa siña adulto i hóben apresiá nos naturalesa: nos mondi, laman i airu fresku. Biba di un manera duradero ta nifiká biba den harmonia ku naturalesa. Adulto i hóben mester bira (ta mas) konsiente di unda nos kuminda, pañanan i energia ta bini. Mester siña planta palu, mata i berdura i siña haña rèspèt pa animalnan. Esaki por hasi na skol pero tambe na sentronan den bario. Pa realisá esaki Kòrsou Solidario i Duradero ta bai traha ku algun universidat internashonal pa krea i ekipá un asina yamá ' trùk di energia' finansiá dor di fondonan disponibel. E trùk aki lo kore rònt Kòrsou pasa den tur bario i na skolnan pa duna lès den durabilidat, splika formanan di energia limpi ku modèlnan simpel, òf yuda kordiná proyektonan ‘bèrdè’.
Komunidat Oropeo i nos desaroyo
Pa nos por yega na un desaroyo duradero KSD ta di opinion ku mester enfoká muchu mas riba e ayudo ku nos por haña di Komunidat Oropeo (lesa nos puntonan di lansa Durabilidat i Ekonomia Diversifika tambe). E relashon spèshal ku nos tin ku Oropa ta permití nos hasi uso di fondonan di Komunidat Oropeo. Kòrsou tambe por apliká pa ko-finansiamentu di proyektonan riba tereno di maneho di sushi i di energía alternativo.
Den e Desishon di Asosahon Ultramar (DAU) nobo Komunidat Oropeo ta ofresé e País i Teritorionan Ultramar (PTU) yudansa tékniko i finansiero pa asina e.o. Kòrsou tambe por bai dene rumbo di desaroyo duradero dor di krea un ekonomía bèrde. Alabes, Komunidat Oropeo por yuda e PTUnan implementa medidanan medio ambiental manera maneho di sushi, adaptashon pa kambio di klima i energía duradero.
KSD ta kere den un ekonomía basá riba energia duradero. Un di e puntonan di kooperashon den e asosashon ku Komunidat Oropeo ta Korsou komo ‘Centre of Excellence’. Nos isla por bira un test case pa mundu henter ora ta trata desaroyo duradero ku ta kumpli ku metanan ekonomiko-soshal i ku adpatashon di kambio di klima.
Areanan di koperashon ku Komunidat Oropeo
E koperashon ku Kòrsou den area di maneho di sushi ta pa promové e mihó praktikanan di medio ambiente den tur operashon relashoná ku maneho di sushi, inkluyendo redukshon di sushi, resiklahe òf otro proseso di rekuperashon, e.o. rekupera energía ku por wòrdu utilisá pa generá koriente i eliminashon di sushi.
Pa loke ta trata energía duradero e koperashon ta dirigí su mes na promé lugá riba produkshon di energía, distribuishon i akseso, en partikular pa desaroyá i promové uso i almasenamentu di energía duradero na Kòrsou proviniente di fuentenan di energía renobabel. Komunidat Oropeo por yuda tambe ora ta trata maneho i aprobashon di un reglamentu ku mester garantisá tarifanan di koriente ku e siudadano por ‘afford’. Na di tres lugá Komunidat Oropeo ta ofrese ayudo tékniko i finansiero pa promove desaroyo di transporte privá i públiko bèrde, manera bus i –outonan hybrid, eléktriko of hidrógeno. Inkluyendo primaramente kreashon di un mihó infrastruktura pa kompartí outo pa p.e. bai trabou of pa hiba mucha skol i segundamente pa traha kamindanan spèshal pa kore baiskel. Por ultimo e koperashon por enserá yudansa finansiero pa krea un infrastruktura ideal pa atrae tursimo berde.