KSD doet een voorstel voor een duurzame economische ontwikkeling
Category 2017-11-14
Ban realisá un kresementu ekonómiko sólido: un proposishon di Kòrsou Solidario i Duradero.
Pakiko bini un un “Órgano di Kontrol i Aporte pa Desaroyo Ekonómiko Kòrsou (OKADEK)”?
1. Nos ta di akuerdo ku un presupuesto balansá por ta un meta importante pa gobernashon. Sinembargo e meta di balansá presupuesto no ta meta final di gobernashon: e meta final ta e bienestar duradero di hinter pueblo di Kòrsou. Aworakí por ehèmpel solamente un parti di e poblashon ku por traha tin trabou.
2. Ku sosten di e supervishon finansiero ku a bin disponibel den Reino, Kòrsou a logra e meta di balansá presupuesto den relativamente tiki tempu. Kon ku bo mir’é, e balanse di presupuesto ta resultado di nos propio esfuerso, gobernantenan ku sosten i sakrifisio di nos pueblo, no di e supervishon finansiero riba su mes. E supervishon lo tabatin su influensia si, di tal manera ku a logra e meta di balansa presupuesto den tempu hopi kòrtiku.
3. Lamentablemente maneho riba diferente tereno importante, ku ta estréchamente ligá ku bienestar di nos pueblo, no tabatin espasio pa desaroyá paralelo na e maneho di balanse di presupuesto. Un di e áreanan ei ta desaroyo ekonómiko. Ekonomia ku ta krese ta nifiká mas produkshon, mas empleo, mas aporte na presupuesto dor ku mas empresa i mas empleado ta paga impuesto. Nos por konkluí anto ku a yega tempu pa nos pèrkurá pa un kresementu ekonómiko sólido i supstansial: esei na promé lugá pa tur hende tin trabou, pa mihó kuido di salú i kuido sosial, mas siguridat, i mihó enseñansa. Na di dos lugá: pa hasi e balanse di presupuesto ku nos a logra ku asina tantu esfuerso un balanse duradero. Miéntras nos ta pèrkurá pa e kresementu ekonómiko, nos tin ku mantené e disiplina di balansá nos presupuesto nashonal.
4. Nos ta kana atras riba otro áreanan di maneho manera enseñansa, maneho sosial, pero nos ta skohe pa duna desaroyo ekonómiko un sosten gubernamental speshal, pa medio di un Organo di Kontrol i Aporte pa Desaroyo Ekonómiko (OKADEK). E motibu ta ku pa medio di desaroyo ekonómiko nos ta krea posibilidat di èkstra espasio pa e otro áreanan menshoná. Por lo pronto nos ta asumí ku e otro áreanan no tin mester di e tipo di sosten ku un órgano manera OKADEK por brinda, i ku nan ta rekuperá riba propio forsa.
5. OKADEK ta purba imitá e efekto ku CFT tin riba e tereno di maneho finansiero riba tereno di desaroyo ekonómiko. Tin un nota serio di prekoushon, pasobra parti di nos komunidat por kategorisá CFT komo un medida “ impon’é” òf hasta “ kolonial”. Kòrsou Solidario i Duradero kier enfatisá ku e idea di OKADEK a originá serka yunan di Kòrsou ku ta mira e importansia grandi di desaroyá otro áreanan di maneho ku huntu ku un maneho finansiero responsabel tin ku kondusí na bienestar duradero di (hinter) nos pueblo. Ta tradukshon di sklamashon di pueblo pa alivio den un stap chikí, pero importante, pa nos asumí responsabilidat pa nos mes i desplegá e disiplina nesesario pa logra kresementu ekonómiko: pa nos logra ku no solamente algun miembro di nos komunidat, pero hinter nos forsa laboral tin trabou.
6. Asina ei mes kisas no ta fásil pa haña un mayoria di lidernan lokal tras di un konsepto manera OKADEK. Esei pasobra OKADEK ta marka e kuadro tékniko ku gobernantenan tin ku respetá; ta posibel ku tin polítiko ku ta preferá di operá sin un kuadro asina, pa e tin mas libertat di moveshon. Kier men, nos mester ta kontentu si por ehèmpel e próksimo koalishon di gobièrnu por haña su mes den un aserkamentu manera OKADEK.
7. Tòg nos ke tribi mustra riba un posibel efekto positivo pa kresementu ekonómiko na Kòrsou si ankra OKADEK di un manera òf otro na nivel di Reino. No ta un stap ku ta estriktamente nesesario for di inisio, pero ta simplemente un opshon ku nos por konsiderá i eksplorá si nos ke.
8. Un otro opshon ta pa Kòrsou promové pa otro paisnan den Reino tambe bini ku un órgano komparabel ku OKADEK. E opshonnan bou di “7” i “8” ta kuadra ku palabrashonnan i òf intenshonnan di koperashon entre paisnan den Reino.
9. Tokante nos eskoho pa nombra boluntario den e órgano OKADEK: nos a pensa ku kambio di e manera di hasi kos por generá hopi energia. Banda di esei nos ke mustra riba e echo ku estudionan sosial i sikológiko a indiká ku rekompensa ekstrínsiko (manera un salario) por sabotiá e motivashon intrínsiko, ke men e motivashon pa logra realmente loke ta meta di e esfuerso, esta kresementu ekonómiko. Ku otro palabra, kontrali na e intenshon, no ta desaroyo ekonómiko pero e salario ta bira e meta final. Ta konosí ku hopi medio finansiero no ta keda tradusí den yudansa konkreto pa esnan den nesesidat, pero si den salarionan, edifisio i strukturanan. E motivashon intrínsiko den kaso di OKADEK ta e satisfakshon personal di a logra realisá kresementu ekonómiko sustansial den un pais hóben, i asina kontribuí na bienestar, speransa, i sentido di ta parti di un komunidat, patriotismo bou di siudadanonan, i na relashonnan nobo i konstruktivo den reino.
10. Finalmente e nòmber “Órgano di Kontrol i Aporte pa Desaroyo Ekonómiko Kòrsou (OKADEK)”, ta un nòmber ku nos a pensa pa un solushon ku nos mes a pensa, pa atendé ku retonan di awor i siñando di foutnan di pasado. E nòmber ta ekspresá nos deseo i konfiansa ku nos gobernantenan ta tene nan mes na reglanan di bon gobernashon. Si a traha plannan a base di diálogo ku stakeholders, a hasi uso di nos rekursonan humano i finansiero, a envolví UNDP, e plannan ei tin ku keda efektuá den bon konsulta ku stakeholders. E plannan ei ta kontené rekomendashonnan di e stapnan ku nos tin ku tuma pa nos bai dilanti. Nos no por hasi komo si fuera e plannan ei no ta eksistí.
Plan Nashonal di Desaroyo i Plan Maestro pa Turismo
Kòrsou mester di kasi un milager riba tereno di desaroyo ekonómiko, pa krea sufisiente empleo duradero. E milager ei no ta bini di su mes, pero mas bien komo konsekuensia di esfuerso efikas, i disipliná, kasi sobre- humano di nos gobernantenan i stakeholders. Tur, huntu òf kada un riba nan mes, mester hasi loke tin pa hasi, i keda sin hasi loke no ta nesesario òf loke por ta kontra- produktivo. Ta trata di un deber moral tambe. No tin tempu, energia, ni rekurso pa pèrdè.
E esfuerso ta rekerí, no solamente di e Minister di Desaroyo Ekonómiko, pero tambe di e otro ministernan, por ehèmpel esun enkargá ku Desaroyo Sosial, Enseñansa i Salú Públiko i stakeholders. Parti di e esfuerso ta konsistí di motivá, inspirá, guia i stimulá hende. Nos ta proponé pa e Minister di Desaroyo Ekonómiko tin e responsabilidat pa e kartera Sosial, Trabou i Bienestar, unabes ku su efektividat tin reperkushon grandi pa asuntunan sosial di trabou.
Nos pais a traha ku yudansa di UNDP un plan nashonal pa desaroyo. Tabatin diálogo demokrátiko pa garantisá embolbimentu di stakeholders.
E gran nesesidat pa efektuá desaroyo ekonómiko ta indiká ku ta bon pa laga konosedónan ku eksperensia den ehekushon guia e proseso di implementashon.
Kresementu ekonómiko ta duna oportunidat pa inkluí mas yu di tera den proseso laboral, pues ta kaba ku e situashon kaminda nan ta ekskluí di trabou i ta krea kondishon pa mas partisipashon di siudadanonan den desaroyo di nos komunidat, ta kondusí na balor propio, entusiasmo i sentido patriótiko. E konsultanan ku tabata nesesario ya a keda realisá bou di guia di UNDP, i awor a yega ora pa efektuá e plannan. No tin mas tempu pa drai rònt, nesesidat di nos pueblo ta sklama pa entre otro oumento di kupo di trabou. Nos ta proponé pa Plan Nashonal di Desaroyo bira un kuadro legal pa desaroyo ekonómiko durante próksimo sinku aña.
“Órgano di Kontrol i Aporte pa Desaroyo Ekonómiko Kòrsou (OKADEK)” ta para sentral den proseso di ehekushon di plan nashonal di desaroyo!
Nos ta proponé pa bini ku un órgano di supervishon lokal na e nivel di mas haltu den nos struktura gubernamental. E órgano ta konsistí di tres miembro, i tin tarea di supervisá desaroyo ekonómiko na Kòrsou sigun e plan Nashonal pa Desaroyo: “Órgano di Kontrol i Aporte pa Desaroyo Ekonómiko Kòrsou (OKADEK)”. E órgano ta mas ku un task force. Su responsabilidat i outoridat ta mas komparabel ku e Kolegio pa Supervishon Finansiero, CFT, numa e e supervishon tin un tarea estriktamente lokal.
E tim ta konsistí di konosedónan di e materia di desaroyo ekonómiko, ku ta hasi e trabou a base boluntario, i ta konta ku sosten di UNDP. Parlamento ta nombra e tim, riba proposishon di minister pa Desaroyo Ekonómiko. E boluntarionan ta keda buská i selektá a base di un perfil bon definí, pa medio di un prosedura di solisitut habrí. Integridat ta un eksigensia importante durante selekshon.
Ta traha ku boluntarionan, pa enfatisá ku tur hende ku ta den posishon pa yuda efektuá desaroyo ekonómiko tin obligashon moral pa duna un man. Ehekushon di e plan pa desaroyá ekonomia tin e meta di krea kupo di trabou pa esnan ku no tin trabou, i no ta kuminsá ku krea puestonan ku salario haltu djis pa algun hende.
OKADEK ta utilisá relashonnan den Reino, relashonnan ku Union Europeo i relashonnan ku paisnan internashonal pa kumpli ku su enkargo.
Transparensia, independensia, i profeshonalidat ta prinsipionan fundamental den e manera di funshoná di OKADEK.
Tin un sekretariado ku ta sostené OKADEK den su funshon. Tin ku detayá e tareanan bon: e órgano tin ròl di konsehá i señalá. Su tareanan ta di proponé, konfirmá proyektonan ku ta pas den kuadronan palabrá di e plan nashonal di desaroyo, a korto plaso òf a largu plaso, i den kua durabilidat ta un kriterio importante. OKADEK ta traha di manera transparente, i pa supervisá ta uza kriterionan ku UNDP desaroyá.
Pa por supervisá optimal OKADEK mester haña un bista di e siklo di presupuesto di Gobièrnu, i maneho finansiero di Gobièrnu, i tambe riba proyektonan di invershon tokante kua mester tuma desishon. OKADEK ta husga e proyektonan a base di kriterio i eksigensianan di e Plan Nashonal, i si ta nesesario ta duna konseho. OKADEK por duna su konseho riba proyektonan den pipeline, sea a base di propio inisiativa òf riba petishon di Gobièrnu
Supervishon eksterno pa medio di CFT a keda instituí pa evitá ku ta surgi problema nobo riba tereno di finansa públiko. A base di esfuerso grandi di nos gobernantenan i nos pueblo a logra balansa finansa públiko. Pero dor di faktornan di rísiko riba otro tereno di maneho, entre kua desaroyo ekonómiko, e balansa ta kore rísiko di no ta duradero. Ta bon pa CFT Kòrsou ta konsehero di OKADEK.
Nos ta invitá bo pa bo duna bo sugerensia riba tur aspekto di OKADEK (inklusive e nòmber), di tal manera ku e por bira un órgano vital pa yuda nos efektuá un kresementu ekonómiko supstansial na Kòrsou.